ວັນທີ 30 ຕຸລາ, ສະຫາຍ ນາງ ຟ່າງ ຫົງ, ເອກອັກຄະລະຖະທູດວິສາມັນຜູ້ມີອຳນາດເຕັມ ແຫ່ງ ສປຈີນ ປະຈຳ ສປປລາວ ໄດ້ເຂົ້າຢ້ຽມພົບປະ ທ່ານ ວັນໄຊ ພອງສະຫວັນ ກຳມະການກົມການເມືອງສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງບລັດ ລາວ ໂດຍໄດ້ສະເໜີຈິດໃຈກອງປະຊຸມຄົບຄະນະຄັ້ງທີ 5 ຂອງຄະນະບໍລິຫານງານສູນກາງພັກກອມມູນິດຈີນ ສະໄໝທີ XX, ເຊິ່ງກອງປະຊຸມໄດ້ກຳນົດແນວຄິດຊີ້ນຳ ແລະ ຫຼັກການສໍາຄັນໃນການຊຸກຍູ້ການຄຸ້ມຄອງພັກໃຫ້ເຂັ້ມງວດຢ່າງຮອບ ດ້ານ ແລະ ຕໍ່ເນື່ອງ, ພ້ອມທັງກຳນົດພາລະໜ້າທີ່ຍູດທະສາດ ແລະ ມາດຕະການອັນສໍາຄັນ,ທ່ານທູດໄດ້ເນັ້ນໜັກວ່າ ຝ່າຍຈີນ ຍິນດີທີ່ຈະເພີ່ມທະວີການແລກປ່ຽນບົດຮຽນການຄຸ້ມຄອງພັກບໍລິຫານລັດ ຮ່ວມກັບຝ່າຍລາວ.

ສະຫາຍ ວັນໄຊ ໄດ້ຕາງໜ້າໃຫ້ຝ່າຍລາວໄດ້ສະແດງຄວາມຊົມເຊີຍຢ່າງອົບອຸ່ນຕໍ່ຜົນສໍາເລັດອັນງົດງາມຂອງກອງປະຊຸມ ທັງໄດ້ສະແດງຄຳເຫັນວ່າ ພາຍໃຕ້ການນໍາພາອັນເຂັ້ມແຂງຂອງສູນກາງພັກກອມມູນິດຈີນ ໂດຍມີສະຫາຍ ສີ ຈິ້ນຜິງ ເປັນແກນນໍາ, ພັກກອມມູນິດຈີນ ໄດ້ເພີ່ມທະວີການປັບປຸງກໍ່ສ້າງພັກຢ່າງບໍ່ຢຸດຢັ້ງ, ໄດ້ສັງຮວມ ແລະ ສ້າງແນວຄິດ ສີ ຈິ້ນຜິງ ກ່ຽວກັບການກໍ່ສ້າງພັກເຊິ່ງເປັນຜົນງານທາງດ້ານທິດສະດີອັນສໍາຄັນ, ຊຸກຍູ້ໃຫ້ການຫັນເປັນທັນສະໄໝ ແບບຈີນ ບັນລຸການພັດທະນາຢ່າງກ້າວກະໂດດຂ້າມ.

ກອງປະຊຸມ ໄດ້ວາງແຜນຢ່າງເປັນລະບົບໃນການຊຸກຍູ້ການຄຸ້ມຄອງພັກໃຫ້ເຂັ້ມງວດຢ່າງຮອບດ້ານ ແລະ ຕໍ່ເນື່ອງ, ເຊິ່ງມີຄວາມໝາຍຄວາມສໍາຄັນຢ່າງຍິ່ງຕໍ່ການຮັດແໜ້ນຖານະການເປັນພັກກຳອຳນາດຂອງພັກກອມມູນິດຈີນ ແລະ ຍົກສູງປະສິດທິຜົນຂອງການກໍ່ສ້າງພັກທັງມີຄຸນຄ່າໃນການຖອດຖອນບົດຮຽນຢ່າງສູງໃຫ້ແກ່ຝ່າຍລາວ ໃນການເພີ່ມທະວີການກໍ່ສ້າງພັກ, ຮັບປະກັນຄວາມປອດໃສຂາວສະອາດ ແລະ ຄວາມເຂັ້ມແຂງຂອງພັກ. ຝ່າຍລາວ ຈະເພີ່ມທະວີການແລກປ່ຽນ ແລະ ຖອດຖອນບົດຮຽນຮ່ວມກັນ ກັບຝ່າຍຈີນ.